سعديه الصعيديه وميدو الاستايل حلقات متجدده تم اضافه الحلقه الاخيره

الحلقه السادسه عشر

سعديه بقى بعد اما روحت بيت عمها حست انها مخنوقه ومدايقه ومش عارفه تعمل
اى حاجه خرجت لعمها واستاذنت منه انها تروح البلد عن اهلها تقعد 15 يوم
تفك عن نفسها وتسلم على امها وابوها واخواتها اصلهم وحشوها وفعلا عمها
وصلها لمحطه القطر وركبت سعديه وروحت بلدهم وبعد اما وصلت البيت وسلمت على
ابوها ومامتها واخواتها واعدت بقى تحكيلهم على مصر وكمان على الى شافته فى
الرحله وهمه مندهشين بقى وباباها
عمال يوصيها بقى
الحج سليمان ابو سعديه

الحج سليمان : بت يا سعديه تاخدى بالك من نفسك ومن شباب مصر دول علشان دول جولالات خشى ولا يخافوا ربنا اوعى حد يغويكى ويضحك عليكى

سعديه : يغوينى ايه يابا دول ولا يفرجوا حاجه عن البنات مستحيل ابص لحد فيهم متخافش يابا معاك راجل

الحج سليمان : عارف يا بتى وعلشان كده امنت عليكى وسبتك تسافرى تتعلمى وحدك
وفى اثناء الحوار دخل *** عمها الى بيحب سعديه وعايز يتجوزها اسمه محمدين

محمدين : السلام عليكم ازيكم يا جماعه

سعديه : فى سرها ( يا جاعدين يكفيكوا شر الجايين ابو الفصاد جه يادى اليوم لاسود ) اهلا يا محمدين

محمدين : ازيك يا سعديه يا بنت عمى نورتى البلد كيف احوالك

سعديه : الحمد لله يا محمدين كويسه

محمدين :ايه يا بنت عمى امتى امتحاناتك علشان نعمل فرحنا

سعديه : فرح مين انت يا ابو فرح اصوم اصوم وافطر على بصله ادى الى ناجص اخدك انت

محمدين : ليه يا سعديه هو انا بصله

سعديه : ايوه وبصله مصننه كمان ووبشراشير طويله وهبله ومعفنه وريحتها وحشه كمان

محمدين : عيب كده يا سعديه تشكرى يا بت عمى بس اعملى حسابك مش هتاخدى غيرى انا

الحج سليمان ابو سعديه اعد مش عاجبه الوضع
الحج سليمان : انتى يا بت مش هتاخدى غير *** عمك اخرسى مش هتاخدى غير محمدين

سعديه : ومالك يابا فرحان جوى كده وانت بتجول محمدين على اساس ان الدوبل مش محمد واحد اتنين فى بعض ولا على اساس انه رئيس الوزراء

الحج سليمان : انا جولتها كلمه وهشوف كلام مين الى هيمشى

وسابها وخرج هو ومحمدين واعدت هى ومامتها الست عطيات

الست عطيات : ايه يا سعديه التعليم خلاكى تعلى علينا يا بتى

سعديه : تعليم ايه ونيله ايه يا امه ده مش بيعرف الالف من كوز الدوره ولا حتى بيعرف يكتب اسمه

الست عطيات :ده *** عمك وعارك يا بتى

سعديه : على اساس ان انا الراجل وهو الست عارى وهلمه بس ياما علشان انا مش
ناجصه وكرهت البلد من بوزه الفجرى ده الى شبه الشبشب المجلوب ولو كلمه
تانى هسيب البلد وهمشى انهرده مش هبات فيها

الست عطيات : خلاص يا بتى انا سكت اهو بس انتى لازم تراجعى نفسك ربنا يهديكى

سعديه بقى اعدت هتموت ومش طايقه اى حد وبدأت تفكر
( محمدين مين ده الى هتجوزه انا كنت بقول محمد لا طلعلى محمدين واهو كمان
محمدج خطب البت ام سحلول الى اسمها جنى ربنا ياخدها وجنى يركبها ولا
يعرفوا يطلعوه منها بس انا مش ممكن اوافج على ابو الفصاد ده ولا يمكن
اتجوزه ادى الى ناجص اخد واحد جاهل وكمان فجرى وشه يجطع الخميره من البيت
انا هجدى ايامى دى على خير وعلى ما تاجى الاجازه اكون لجيت حل يلا اروح
انام احسن من وشهم )
ونامت سعديه وهنشوف الحلقه الجايه حصل ايه

يعينى عليكى ياسعديه

علشان خاطر تريكه نزلت حلقتين [ندعوك للتسجيل في المنتدى أو التعريف بنفسك لمعاينة هذه الصورة]

هههههههه تسلم يا اتش

جمييييييييييلة جدا يا هشام تسلم ايدك
و يا رب دايما تمتعنا بمواضيعك الاكثر من رائعة

شكرا بيوتى منوره

شكرا لمرورك يا احمد اوعدك مش هنسى اعمل الحلقه كل يوم
ولو نسيت ابقى فكرنى [ندعوك للتسجيل في المنتدى أو التعريف بنفسك لمعاينة هذه الصورة]

الحلقه السابعه عشر

قضت سعديه الاجازه فى بيت اهلها وهى فى حيره مش عارفه تعمل ايه يا ترى
هتوافق على محمدين ور ترفضوا وكمان هى متقدرش توافق عليه علشان مش بتحبه
وكمان متقدرش ترفضه علشان اهلها وكمان مش عارفه تعمل ايه مع ميدو يا ترى
تصارحه بحبها ولا لا وهى شايفه انها غلط تقله وخصوصا ان هو خطب ومش صارحها
انه بيحبها وهى طبعا طول الوقت سرحانه وبتفكر ومش عارفه تعمل ايه وبعد
انتهاء الاجازه نزلت مصر علشان الامتحانات بعد اما وصلت راحت الجامعه تانى
يوم وقابلت ندى وحكتلها على كل حاجه

ندى : ياااااااااه يا سعديه كل ده فى قلبك وساكته طيب انتى ليه مش قلتى لميدو انك بتحبيه او صارحتيه كان ممكن ميخطبش جنى دى

سعديه : انتى مجنونه يا بت ولا ايه انا اصارحه لا كرامتى متسمحليش

ندى : الموضوع مش كده يا بنتى هو كان ممكن يفكر فيكى ويحبك

سعديه : انتى هبله والله يا بت ده بيحب العفريته الى اسمها جنى وهو اصلا مش بيفكر فيا ولا باجى على باله

ندى : بس انا لاحظت انه معملته ليكى مختلفه وكمان مهتم بيكى الفتره الى فاتت دى وكمان كان بيزعل جنى علشانك

سعديه : امال ايه الى خلاه خطبها تكونش سحراله ماهى جنى بحالها تلاجيها شغلت العفريت بتوعها وسحرتله

ندى : ههههههههه والله انتى فظيعه وده وقت تهريج يابنتى فكرى هتعملى ايه فى محمدين ده كمان

سعديه : والله ايم سوده ومش عارفه حاجه جال محمدين جال هو انا طايله محمد علشان اخد محمدين دى ايام هباب

ندى : بصى انتى قولى لاهلك لا واهتمى بميدو شويه يمكن يسيب الزفته دى ويهتم بيكى انتى

سعديه : الى اهم من ده كله الامتحانات جربت ولازم اهتم بيها

ندى : اه كده كويس بس لازم تتغيرى شويه علشان ينجذب ليكى ويحبك بقى

سعديه : اتغير ازاى بجى

ندى : يا بنتى انتى اجمل من جنى دى بالف مره لو اهتميتى بنفسك شويه وباستايل لبسك هتبقى قمر

سعديه : موافجه بس باحترام ومخلعش الحجاب

ندى : اوك نخرج بعد المحاضرات ونشوف هنعمل ايه

وبعد اما خلصوا المحاضرات نزلوا اشتروا شويه حاجات ولبس بقى وندى غيرت
استايل سعديه خالص وكمان خدتها الى بيوتى سنتر علشان تغير من شكلها
ومظهرها شويه
دخلت سعديه وهى مستغربه طبعا على الى بيحصل

سعديه : بت يا ندى ايه ده

ندى : بصى هنا هنعملك ميكب وهنظبطك شويه وهخليها تعلمك ازاى تحطى ميكب لنفسك وهشتريلك ميكب خاص بيكى

سعديه : بصى يا بت بلا ميكب بلا هباب الطين ده لا انا مش اغير فى خلجتى ياختى

ندى : يا بنتى مش هتغير فى خلقتك ولا حاجه بصى دى حاجات بسيطه وهاديه اوى بصى انا حاطه اهو واضح انى حاطه حاجه
سعديه : ايوه بس مش جوى

ندى : طيب هيبقى كده مش ظاهر

سعديه : بس جوليلها والنبى يبجى خفيف جوى مبحبش الهباب ده

ندى : لا هخليها تعلمك ازاى تحطى لنفسك علشان تعملى كل يوم لوحدك

علموا سعديه ازاى تحط ميكب هادى وكمان ازاى تغير لفه طرحتها للموضه وبعد
ما خلصوا الشوبنج واللفه الطويله دى روحت سعديه عند بيت عمها استغربوا
طبعا للوضع الى فيه سعديه بجد بقت زى القمر وهى قمر من الاول بس مكنتش
مهتتمه بنفسها

مرات عمها : ايه ده يا سعديه ايه الى انتى عملاه فى نفسك ده

سعديه : ايه يا مرات عمى شيفانى ماشيه على اربع رجلين ولا ايه ما انا زى مانا

مرات عمها : لا التغيير فى شكلك وفى لبسك انتى بقيتى قمر

سعديه : جمر بالستر يا مرات عمى ما انا جمر من زمان هو انتى حوله ولا ايه مكنتيش بتشوفى

مرات عمها: قمر اه بس بقيتى قمر 14

طبعا الكل معجب بسعديه وبالاستايل الجديد وسعديه كانت فرحانه بكده وطبعا
تانى يوم صحيت الصبح بدرى وعملت الى قالتلها عليه ندى وعملت الميكب الهادى
الجميل ولبست اللبس الجديد وعملت الطرحه زى ما علمتها وبقت جميله اوى وراحت
الجامعه اول اما دخلت
هنشوف الحلقه الجايه

هههههههههههههه
والله انتى نكته يا سعدية كل ده علشان ميدو
ربنا يستر عليكى

ولسه هتشوفى يا بيوتى

بجد جاااااااااااامده اوى بس بليز بلاش اللون الازرق ده يا araghon و متتاخرش علينا في الحلقه الجايه

ماشى هغير اللون
انا والله بنسى خالص انزل المسلسل ابقو فكرونى

الحلقه الثامنه عشر

صوره سعديه فى الاستايل الجديد

[ندعوك للتسجيل في المنتدى أو التعريف بنفسك لمعاينة هذه الصورة]

اول اما دخلت سعديه الجامعه قابلت ميدو ميدو بيبصلها وبيشبه هى دى سعديه ولا لا

سعديه : صباح الخير يا محمد
ميدو : انتى سعديه صح

سعديه : ايوه سعديه يا ولا امال خيالها ولا ايه ولا يكونشالعفريت بتاعها

ميدو : ايه الى انتى عملتيه فى نفسك ده

سعديه : ماله يا ولا وحش ولا ايه
ميدو : وحش ايه ده انتى بقيتى قمر فى يوم وليله كده
سعديه : انا جمر من الاول بس انت الى ما بتشوفش
ميدو : ده انتى كنتى مدفونه فى كوم قش بس بجد بجد قمر
سعديه : خلاص يا ولا هتجعد تجول جمر كده للصبح ولا ايه المحاضرات هتخلص ومش هنحضر ولا وحده يلا نشوف البت ندى وندخل المحاضره
ميدو : اوك يلا بينا
راحوا طبعا خدوا ندى ودخلوا المحاضره وبعد اما خرجوا من المحاضره لقوا طبعا الهانم جنى مستنياهم فى الكافتريا ومحضرتش المحاضره
جنى : ازيكوا يا جماعه عاملين ايه
ميدو : الحمد لله انتى اتاخرتى ليه ومحضرتيش المحاضره
جنى : معلش راحت عليا نومه بقى لانى كنت سهرانه
سعديه : هو انتى فالحه غير فى كده
جنى : بتبص اوى لسعديه
هى مين دى
سعديه : ايه يا بت مش عارفه مين دى انتى انتصيتى فى نظرك
جنى : سعديه مش معقول ايه الى عمل فيكى كده يابنتى ده مش استايلك ليه تلبسى حاجه مش ليكى
سعديه : شكلك كده موتكك على يدى وجولتهالك الف مره مش احسن من الى انتى لبساه يا ام سحلول
ميدو : ليه يا جنى دى سعديه بجد بقت قمر بقت عسوله اوى
ندى : طبعا سعديه قمر من الاول بس هو تغيير بسيط
سعديه : اصل يا بتى همه مش بيشوفوا مش بيهتموا غير بالمظاهر وانا حبيت اثبتلهم انى احسن منهم بس بردو باحترامى
ميدو : طبعا يا سعديه بجد انتى قمر من غير حاجه
جنى : طبعا متنرفزه اوى من ميدو
ومالك كده بتقول قمر وانت بتبصلها اوى كده ليه تكونش معجب بيها
ميدو : ايه يا جنى الى بتقوليه ده اعقلى
جنى : لا مش هعقل وعندك سعديه اشبع بيها
سعديه : ايه يشبع بيها دى على اساس انى ساندوتش ولا برتوجاله انتى عيله معفنه وانا سيبالك المكان بالى فيه علشان مش ارتكب جنايه
ندى : ميدو روح صالح جنى بقى وانا هروح ورى سعديه اشوفها رايحه فين
ميدو : اوك قولى لسعديه متزعلش
ندى جريت ورى سعديه
ندى : سعديه استنى
سعديه : مش هستنى ولا حاجه
ندى : بت استنى شفتى الى حصل شكله الاخ وقع على جدور رقابته
سعديه : جدور ايه وعيدان ايه ده مش بيهمه غير المظاهر انا عايزاه يحبنى لشخصى لسعديه نفسها مش لشكلها
ندى : اصبرى يا ستى وحده وحده واحنا اهم حاجه دخلنا من الباب الى بيهتم بيه وبعد كده هنخليه يحب سعديه لشخصها
طيب اما نشوف
واثناء الحوار ميدو جه هو وجنى
ميدو : يا جماعه انا عازمكوا بعد بكره عيد ميلادى
طبعا هتيجوا كلكوا الى مش هيجى هزعل
سعديه : انا مش هروح عند حد ولا عيد ميلاد ولا اى حاجه انا هزاكر عليا امتحانات
ندى : يعنى انتى عليكى امتحانات واحنا لا تعالى معانى مش هتخسرى حاجه
سعديه : انا مش مستعده لكده
ندى : يا بنتى بكره الجمعه ويوم السبت هاجى اقضى اليوم كله معاكى ونروح انا وانتى عيد الميلاد سوى ويمكن يتغير حاجه افهمى بقى
ندى : ميدو خلاص ان شاء الله احنا جايين
ميدو : خلاص اوك بس لو مش جيتوا هزعل
وقضوا اليوم وخلصوا محاضراتهم ورواحوا وجه يوم الجمعه الى سعديه اعدت تفكر
فيه طول اليوم يا ترى هتعمل ايه بكره وهتلبس ايه وهتتصرف ازاى وكان يوم
طويل من التفكير وجه يوم السبت ندى اتصلت بسعديه وقالتلها انا جايه علشان
يجهزوا لعيد الميلاد
ونشوف بقى حصل ايه الحلقه الجاااااااااااااااااايه

جميييييييييلة
بس حرام عليك ارجوك كمل الباقى بسرعة بقى
مستنين على احر من الجمر

ماشى يا بيوتى استنى الحلقه نازله فى الطريق

الحلقه التاسعه عشر

وصلت ندى عند سعديه واعدوا يتكلموا يا ترى هنلبس ايه

ندى : يا بنتى احنا هنلبس فساتين سواريه لان عيد الميلاد هيبقى باليل

ومش هينفع اى لبس كاجول

سعديه : انتى يا بت يا هبابه فساتين ايه العريانه دى الى انتى جيباها لا انا مش هلبسها

ندى : يا سعديه قفليه محجب

سعديه : بردو لا ده مشخلع ياختى

ندى : طيب بصى البسى جربى ولو مش عجبك بلاش منه

ندى لبست سعديه الفستان وقفلتهولها محجب وكانت جميله اوى

وفعلا اقتنعت سعديه بيه ولبسوا وجهزوا

صوره سعديه وندى

[ندعوك للتسجيل في المنتدى أو التعريف بنفسك لمعاينة هذه الصورة]

ونزلوا اشتروا طبعا الهدايا وراحوا عيد الميلاد سعديه طبعا داخله وهى مكسوفه اوى

ومش عارفه تتحرك قابلهم ميدو

صوره ميدو

[ندعوك للتسجيل في المنتدى أو التعريف بنفسك لمعاينة هذه الصورة]

ميدو : اهلا يا جماعه نورتوا والله

ندى : كل سنه وانت طيب يا ميدو

سعديه : كل سنه وانت طيب

ميدو : وانتوا طيبين بس بجد انتوا قمر انهرده

سعديه : شوفى كل مره يجول جمر انهرده على اساس اننا نجوم الايام الى فاتت

ميدو :هههههههه بجد يا سعديه انتى بقيتى قمر الفستان هينطق عليكى

سعديه : شكرا يا محمد

اثناء الحوار حضرت الانسه جنى من داخل الحفله

صوره جنى ( ولو انى مكنتش عايز احطها بس جنى بقه ههههههههه )

[ندعوك للتسجيل في المنتدى أو التعريف بنفسك لمعاينة هذه الصورة]

سعديه : الحجى يا بت يا ندى شوفى البت جنى دى لابسه ايه

ندى : ماهى طول عمرها بتلبس كده مش جديد عليها

سعديه :بس شوفى ضهرها عامل ازاى مش عارفه ايه مزاجها الزباله دى فى انها تبين جسمها

ندى : هههههههه خلاص ياسعديه احنا ملناش دعوه

وجات جنى

جنى : اهلا يا جماعه نورتوا ايه الحاجات الحلوه دى

ندى : ميرسى يا جنى

سعديه : فى سرها ( بترحب بينا على اساس انها صحبت الحفله )

اتفضل يا ميدو وكل سنه وانت طيب

ادت سعديه ميدو الهديه وكمان ندى جنى مسكت هديه سعديه واعدت تبص فيها

جنى : هى ايه دى تلاقيها هديه ب 2 ونص من السوق

سعديه : يا مسهل يا رب انا ماسكه اعصابى بالعافيه علشان متوترش عليكى

واحنا فى بيوت الناس ربنا يهدك هده جويه وياخد اجلك جادر يا كريم

ندى : سعديه متروديش عليها خليكى انتى احسن منها

ميدو : كفايه يا جنى انتى زودتيها اوى بصراحه انتى بقيتى مستفزه اوى احترمى ضيوفى بقى

جنى : ماشى عموما كلامنا مش دلوقتى

المهم الحفله بدأت وكان عيد ميلاد جميل اوى لكن جنى واخده ركن لوحدها

فى البلكونه واعده ميدو دخل علشان يصالحها لقاها بتتكلم فى التليفون فسمعها بتكلم واحد

جنى : ايوه بجد انا مكنتش فاكراك امور ودمك خفيف اوى كده انا لو اعرف انك

انت كده من الاول مكنتش اتخطبت لميدو وكنت حبيتك انت بس على فكره لسه فيه فرصه

لالالالالالالالا ميدو ده مكنتش اتوقع انه كده ده فلاح بيهتم ببنات فلاحه زيه

ميدو ده مش استايلى خالص انا كنت غلطانه

متخافش انا هحاول اخلع منه

معلش بقى يا بيبى انا هقفل دلوقتى وابقى اكلمك اما اروح

علشان محدش يعرف حاجه يلا بقى باى

ميدو بقى سمع كل الكلام وهو ماسك اعصابه بالعافيه

ونشوف بقى حصل ايه الحلقه الجااااااااااااااااااااااااايه
اللى بجد هاتبقى ناااااااااااااااااااار

يا نهار اسود البنت دى طلعت فاسدة بجد
يا عينى عليك يا ميدو
ويا بختك يا سعدية كده الجو هيخلالك
بجد روعة يا هشام وارجوك ما تتاخرش بباقى الحلقات

لسه التقيل ورا يا بيوتى انتظرو باقى الحلقات

بس فيـــــــــــــــــن الناس اللى بتابع مفيش الا اتنين بس اللى متابعين المسلسل

الحلقه العشرين

ميدو : ايه كنتى بتكلمى مين يا جنى

جنى : لا مفيش يا ميدو دى وحده صحبتى

ميدو : مين دى انا اعرف كل صحباتك

جنى : وحده وخلاص انت لازم تعرفها

ميدو : انتى كنتى بتكلبمى شاب صح

جنى : انت مالك شىء مش يخصك

ميدو : يعنى ايه مش يخصنى

انتى نسيتى نفسك ولا ايه انا خطيبك

جنى : الخطوبه ممكن تنتهى عادى اتفضل دبلتك

جنى رمت الدبله فى وش ميدو وطلعت تجرى روحت

ندى وسعديه لا حظوا كده راحوا يشوفوا حصل ايه

ندى : ميدو فيه ايه

ميدو : مفيش الزباله الخاينه هى متستاهلش اصلا انى افكر فيها

مفيش يلا نخلص عيد الميلاد علشان محدش يلاحظ حاجه بعدين ابقى افهمكوا

دخلوا طبعا والحفله خلصت بس ميدو طبعا مش مركز فى اى حاجه

تانى يوم راحوا الجامعه ملقوش ميدو ولا جنى

كل يوم على كده لمده اسبوع

ندى فكرت هى وسعديه انهم يروحوا يزوروا ميدو يعرفوا الحكايه وفعلا

فى اجازه نهايه الاسبوع راحت ندى وسعديه يزورا ميدو

مامت ميدو رحبت بيهم وندهتلهم ميدو طبعا حالته زفت خالص ومش فى المود

ندى :ايه يا ميدو مالك كده

ميدو : مفيش يا ندى الخاينه لقيتها بتعرف واحد غير وبتكلمه

طبعا ميدو حكالهم الى حصل

سعديه : ايه يا ولا دور الدراما ده الى انت عايش فيه وعاملى فيها فيلم درامى

ولا مجتل هنادى هى اصلا متستاهلش جوم كده وركز فى كليتك ومزاكرتاك

الامتحانات بعد اسبوع ولازم تزاكر وتشوف مستجبلك

ندى : فعلا كلام سعديه صح هى اصلا متستاهلش وحده فكرت

فى حد تانى يبقى متستاهلش وهى الخسرانه

سعديه : ايوه وكمان تغنيلها هانى شاكر انما انتى هتخسرى جوم يلا وبطل الهبل ده

ميدو : ده انا معرفش اى حاجه فى المنهج بتاعنا ولا اى كلمه هدخل الامتحان ازاى

سعديه : انا هعرفك يلا هكسب فيك ثواب بعد المحاضرات نجعد ساعتين فى المكتبه

واعرفك الحاجات المهمه ونزاكر سوى

ندى : يلا ياعم حد لاقى صعيديه زى القمر كده تعرفه وتزاكرله

ميدو : انا مش عارف اشكركوا ازاى بجد انتوا احسن اصدقاء شفتهم فى حياتى

وطبعا الاستاذ ميدو بدأيمارس حياته بشكل طبيعى وسعديه بدات تزاكرله

ووقفت جمبه وكان اجمل اسبوع وبدأت الامتحانات ودخلوا اول يوم

ميدو : انا خايف

سعديه : جول يا رب ومتخافش ان شاء الله الامتحان ساهل

دخلوا اللجنه ومن حسن الحظ ندى وسعديه وجنى وميدو فى لجنه وحده
ازاى محدش يسالنى

ههههههههههههههه

بدأ الامتحان وكلهم بدأ يحلوا وواضح ان الامتحان سهل بس الهانم جنى طبعا

اعده مش فاهمه حاجه ولا عارفه تحل ولا كلمه جنى ندهت على سعديه

جنى : سعديه ممكن تقوليلى السؤال الاول

سعديه : طبعا بصوتها كله

لالالالالالالا انا مش بغشش حد بصى فى ورجتك يا ختى

طبعا المراقب جه وسالها فيه ايه

سعديه : عايزه تخلينى اغششها

المراقبل طبعا خد الورق من جنى وطردها بره

بعد نص ساعه نده عليها ميدو

ميدو : سعديه السؤال الاخير ده ايه اجبارى ولا اختيارى

سعديه : يادى الوجعه المهببه الزفت التانى عايز يغش ده انا جايلاله السؤال ده

الف مره بس انا بحبه مجدرش اضره بص يا ولا بص جدامك حل الى تحله

مش هغششك من غشنا فى ليس منا واحترم نفسك بجى

ميدو : هههههههههه طيب اوك مش هغش انا خلصت اصلا

طبعا خلصت الامتحانات كلها وكانت اجمل ايام قضوها سوى وكان فاضل اسبوع

على النتيجه سعديه قررت انها تقضى الاجازه هى وميدو و ندى وتنزل بعد

اما النتيجه تظهر بلدهم فى الصعيد

ونشوف بقى الحلقه الجايه حصل ايه فى الاجازه دى

نتابع الحلقه

الجااااااااااااااااااااايه

انتظــــــــــــــ ونى ــــــــــــــــــــــر

هههههههههههههههههه
بجد خطييييييييييرة
تسلم ايدك هشام
ومعلش لو ممكن تحاول تنزل حلقتين فى المرة يبقى شكرا اووووووووووووووووووووى

ماشى يا بيوتى بس النهايه قربت يعنى

الحلقه الحاديه والعشرون

وفى الاجازه كان اجمل اسبوع راحوا الاهرامات وركبوا الجمال واتصوروا هناك وراحوا القلعه وزاروا حدائق كتير وراحو سينما ومسرح واماكن جميله جدا وفى اخر يوم كانوا قاعدين فى نادى وبيتكلموا فجأه ندى قالت انها رايحه تجيب حاجه واعدت سعديه هى وميدو يتكلموا فجأه ميدو بص لسعديه اوى
سعديه : مالك يا ولا بتبصلى ليه جوى كده انت هتاخدلى صوره ولا ايه
طيب استنى اما اظبط نفسى علشان تطلع حلوه
ميدو : انت حلوه من غير ما تظبطى حاجه
سعديه : وىوىوىوى اعتبر ده غزل ولا ايه انت بتغازلنى يا منيل
ميدو : ومغازلكش ليه انتى الوحيده الى تستحقى كده
سعديه :ازاى يا ولا مش فهماك
ميدو : سعديه انا بجد حسيت انى غلطان الفتره الى فاتت دى كلها وانى كنت مغفل اما بصيت لجنى دى وفكرت فيها
سعديه : اينعم الاعتراف بالحج فضيله يا منيل
ميدو : ههههه لا بجد انا فعلا اكتشفت ان الوحيده الى تستحق حبى ده هى انسانه وحده وقفت جمبى وساعدتنى ومتخليتش عنى هى بجد لو اعدت طول عمرى احبها مش هوفيها حقها
سعديه : انا عرفتها اكيد الست الوالده ايوه لازم نحب ابونا وامنا ونخلصلهم
ميدو : لا يا سعديه انتى فاهمه انا بتكلم عن مين
سعديه الانسانه دى هى انتى
سعديه : انا ايه يلا يادى النيله
ميدو : انا بحبك انتى بجد
سعديه فى سرها اخيرا ابو الهول نطج ازغرتله ده ولا اعمله ايه
انت بتجول ايه بتحبنى انا ازاى
سعديه : زى الناس بجد انا عمرى ما شفت الطيبه دى ولا الروح الحلوه وكمان جدعه بجد ومحترمه انا عشت طول حياتى عمرى ما هلاقى زيك
سعديه : بس يا ولا انا كده ممكن اتغر ومش اشوف حد جدامى بعد كده
ميدو : لا هى دى الحقيقه بس انا عايز اعرف شعورك انتى من ناحيتى ايه
ميدو: كل ده ومعرفتش متفهم يا منيل امال انا عملت معاك كل ده ليه
ميدو : يعنى افهم من كده انك بتحبينى
سعديه : ما بلاش احراج بجى ايوه بحبك خلاص
ميدو طبعا سعيد جدا وكمان سعديه جات ندى وقالولها على الى حصل وانهم اعترفوا لبعض انهم بيحبوا بعض وانا بكره بعد النتيجه هيشوفوا هيعملوا ايه
تانى يوم راحوا يشوفوا النتيجه طبعا التلاته نجحوا وبتقديرات كويسه جدا لكن جنى طبعا لا وبعد اما شافوا النتيجه راحوا اعدوا فى الكافتريا شويه قبل اما سعديه تسافر
ميدو : سعديه انا دلوقتى عايز اروح اخطبك انا ممكن اسافر معاكى
سعديه : لا متتتسرعش كده استنى انا امهدلهم الموضوع الاول
ميدو : ليه همه ممكن يرفضونى
سعديه : مش حكايه يرفضوك انت همه عايزين يجوزونى ابن عمى محمدين وراسهم والف جزمه جديمه ما اخدش غيره
ميدو : لا انا هروح واكلم اهلك واقنعهم
ندى : بص يا ميدو سيبها هى تمهد الموضوع الاول والاهم اننا نخلص من الاستاذ محمدين ده وبعد كده انت تروح تخطب سعديه من غير مشاكل
سعديه : والى لازم افكر فيه دلوجتى هو حاجه وحده ازاى اخلص من محمدين واخليه ينشغل باى حد او يحب اى حد غيرى
ميدو : خلاص انا موافق بس لو معرفتيش تتصرفى اتصلى بيا او بندى واحنا هنحاول نتصرف
سعديه : ايوه انا جبت موبيل علشان اكلمكوا واجلكوا الاخبار اول باول وان شاء الله خير
وبعد اما خلصوا كلام سعديه راحت عند بيت عمها وخدت شنطتها وسلمت عليهم وكان مستنيها تحت ميدو وندى ووصلوها لغايه المحطه ووصلت سعديه البلد بالسلامه تعالوا نشوف حصل ايه الحلقه
الجاااااااااااااااااااااااايه اللى هاتبقى تمام بجد

بجد يا جماعة انا حاسس ان الحلقة ديه فعلا سعدية محترمة اوى اوى ههههههههههه

انتظـــــــــــــــ ونى ــــــــــــــــــر

بجد تسلم ايدك ياarghonومتتاخرش علينا وياريت تنزل حلقتين :س:

thank you

ههههههههههههههههههههههههه
جميلة منك يا مااااااان
[ندعوك للتسجيل في المنتدى أو التعريف بنفسك لمعاينة هذه الصورة] و

جمييييييييلة جدا يا هشام
كمل لوسمحت

ماشى يا بيوتى احنا هنخلص المسلسل بقى علشان الامتحانات

» الحلقه الرابعه من مذكرات مجنونه ....متفوتكش الحلقه دى
» اللحظات الاخيره من الفراق
» رسائل جديده و متجدده؟ياريت اعرف رايكم
» «جارديان» ترشح عمرو زكى للانتقال إلى تشيلسى.. وميدو لويجان فى انتقالات يناير
» مذكرات مدرسة مجنونة... الحلقة الثالثة (فصل البنات) الحق متفوتكش الحلقه دى