السلام عليكم ورحمه الله وبركاته
***
*النهارده زي بكره زي بعده وكل يوم*
مطلع اغنيه لمطرب كده الله اعلم اسمه
بس هي أساسا مش ناقصاه
كفايه الاحباط اللي احنا عايشينه
احباااااااط؟؟!!
لالالالالالا
الكلمه دي مستفزه جدا جدا جدا
*طيب نعمل ايه ماهو مفيش حاجه نعملها ؟!!
بسيطه جدا جدا بس انت اسمع الكلام
انا عندي العلاج
*طيب قولي وانا معاكي..
ايه هو العلاج؟!
وبما ان الكلام فيه كلام تعالوا نبتدي صفحه جديده..
ونكتب روشته جديده..
***
ازاي تجدد حياتك
اعمل ريفريش لايامك
رستر عقلك واحلامك
وتعالي وانا اسمعك كلامك
***
روشته لعلاج الاحباط
***
ولكن اولا اوعدني انك تخلص النيه لله وانك تؤمن بشفائه اكتر من اي روشته في
العالم
***
1-اول حاجه هات قلم وورقه بس خد بالك لو هتبقي صريح هات كراسه ولو هتبقي
صريح قوي هات كشكول ولو هتبقي صريح قوي قوي قوي خد بعضك ومتكملش وانصحك
تنام
2-ااقعد مع نفسك في مكان لوحدك اضاءه خافته ولو بتخاف ابقي افتح الشباك
وخلصنا واسترخي وكل اللي انت عايز تقوله اكتبه
اكتبه كله.. كله
هي الورقه هتفتن عليك؟!..
ولو خلص القلم تعالي وانا اسلفك وكمان القلم مش هيفتن عليك اطمن..
اكتب كل حاجه واي حاجه وخد بالك الصراحه اهم خطوه في خطوات العلاج..
3- بص في الورقه .. ولو في مرايه بص في المرايه
اتامل الورقه ..واتامل نفسك..
ياتري هو اللي في الورقه ده انا؟؟!!
اللي في الورقه حزين زعلان..
واللي انا شايفه دلوقتي ساكت وحيران..
4-متقولش عليا مجنونه لو قلتلك حاول توصل لدرجه الحزن اللي في الورقه
استني استني انت رايح فين ..
عارفه انك مش ناقص منا مش هسيبك كده ميخلصنيش..
هنفترض انك وصلت للحزن اللي في الورقه..
وجواك شحنه غضب كمان اكتر من المكتوب..
طيب وبعدين..
5- اسال نفسك ياتري انا ممكن اعيش عمر غير اللي انا عايشه؟
يعني الحزن اللي انا فيه والغضب ده هيخلوني اعيش عمر تاني؟!
*انتي بتهزري ده انا حاسس ان انا عمري كبر 100 سنه وشويه وهودع..
عارفه ليه لانك مش فاهم حاجه
*أنا؟!
ايوه انت لانك لازم تعرف ان الايام اللي جايه هتعيشها بحلوها ومرها
لانها قدر
فان كان ممكن تغيرها انت ممكن تخليها احلي بارادتك
انما لو كنت هتختار الحزن والغضب اللي انت فيه ده
تأكد انها مش هتتغير سم واحد تجاه الافضل..
اذا آمن العبد بربه
آمن انه بالدعاء والايمان بيديه ان يغير القدر
فما حزن وما يأس
فاهم ولا اقول كمان؟!
*فاهم يا ستي فاهم
6-دلوقتي قطع الورقه..
*يووووووووه .. ده انتي رايقه بقي اكتب وقطع
معلش معلش هديك انا حق المواصلات
قطعها وهات ورقه تانيه..
اكتب فيها هدف كبير قوي في حياتك ..
هدف كتبته في الورقه القديمه
بس شخبطت عليه الظروف وخلته من غير ملامح
اكتبه المره دي بلا ظروف
7-اشتغل وشوف حياتك ماشيه ازاي بس اوعي تنسي حلمك..
عيش علشانه..
حبه زي ما يكون بين ايديك
تيقن ان ربنا كرمه كبير جدا قادر ينولك حلمك طالما وثقت فيه ..
اسعي لو حتي حلمك اخر المشوار..
بس..
توقع السيء
ولكن..
اذا حصل السيء
متقفش تبكي علي اللي فات..
حاول تنقذ اللي باقي من هدفك..
حاول تلحقه علشان حتي تكون حققت جزء من حلمك
8- فكر شويه
معلش اتعب علشان نفسك
فكر لو هتزعل فكر لو هتيأس هو ده الحل
فكر هل سكوتك وانك تتخلي عن حلمك هو ده الحل؟!
تفتكر لو كان الناس بعد عباس بن فرناس يأسوا من انهم يطيروا وخافوا علي
نفسهم كان زمانك شوفت الطياره والهليكوبتر
تفتكر؟!
9- كده بقي يبقي انت طلعت من مرحله الحزن
عارف لو لسه حزين
تيقن انك منفذتش الوعد اللي وعدتهولي في الاول..
10- وهنا ادركت شهرزاد النهار
فسكتت عن الكلام الباح
ونكمل الروشته يوم تاني
الهدف من الكلام مش تطبيق عملي
الهدف من الكلام اني اوريك قد ايه وانت حزين بتناقد نفسك وبتناقد انسانيتك
وايمانك
انا بتكلم عن تجربه شخصيه مش كلام علي ورق
انا مبحبش ابقي غبيه "سوري في اللفظ"
علشان كده لما ببقي حزينه ومحبطه بقول لنفسي كلمتين بس
لو الحزن هيرجعلي حاجه راحت او هيحققلي اللي اناعايزاه انا مستعده افضل
حزينه ومحبطه طول العمر
بس بلاقيه مبيعملش شيء غير ان الصحه بتقل والمزاج بيبقي تحت الصفر
وكمان مبيبقاش عندي استعداد ان بكره ييجي
فبختار الصح وبقول الحمد لله
وشويه وبلاقي جوايا تحدي للواقع
وبلاقيني من محبطه لواحده مستعده تعمل اي شيء.. اي شيء علشان تغير حياتها..
تأكد ان لو الدنيا كلها .. كلها اسودت الاحباط والحزن مش حل
بالعكس ده دول اللون الاسود اللي بيزود الهم هم ..
ويارب يكون الكلام وصلكوا
موضوع: روشتة لعلاج الحزن والاحباط وما الى ذلك 
الثلاثاء 27 أبريل - 6:46
