حصة الألعاب
مبدئيا كده انا مش ضد حصص الألعاب و لا مدرسين الألعاب
بس من يوم ما جم مدرسات التربية الرياضية العملى و انا ما عرفتش ادى حصة على بعضها من غير خناقات و مشاكل
ليه بقى
الجدول من ساعة ما شرفوا فى المدرسة اتغير و بقت حصة البنات فى معاد حصة الكمبيوتر بتاعة الصبيان
حد يقوللى و دى فيها ايه
فيها كتير فيها ان الفصل بتاع الصبيان بيبص على ملعب المدرسة و من هنا ابتدت المشاكل
انا
دخلت الحصة لا بيا و لا عليا و ابتديت اكتب الدرس لقيتهم ساكتين مش طالع
لهم صوت و دى طبعا حاجه غريبة و خصوصا و انا مدياهم ضهرى اذا كانوا ما
بيعملوش كده و انا باصة لهم
المهم قلت ابص لهم فجأه اشوفهم بيعملوا ايه
بابص يا مؤمنين لقيت الفصل كله مرمى على الشباك اللى فى اخر الفصل
هما شوية عيال بس اللى بيكتبوا و الباقى كلهم عند الشباك
ما نطقتش و لا كلمة و عملت للعيال اللى قاعده هس
و روحت واخده الخرطوم و دورت فيهم كلهم الضرب
و قولت لهم اطلعوا لى بقى عند البورد
طلعوا كلهم عند البورد
ايه اللى كنتوا بتعملوه عند الشباك
ما كناش بنعمل حاجه
انطقوا و قولوا كنتوا بتعملوا ايه احسن لكم
يا ميس و الله مافيش حاجه خلاص احنا اسفين
لا و الله ما هاعديها بالساهل كنتوا بتعملوا ايه يا متخلف منك ليه
العيال برضه ساكتين
يعنى مش عايزين تنطقوا خلاص اروح اشوف انا
لقيت حصة الألعاب بتاعة فصل البنات شغاله
يا ولاد اللذين انتوا كنتوا بتتفرجوا على زمايلكم
لأ يا ميس بنتفرج ايه دى كانت فيه خناقه فى الملعب
لا يا راجل
اه يا ميس ده مستر محمد كان بيزعق للعيال فاحنا قمنا نتفرج
و الله
اه يا ميس
و كلكم بقى سمعكم ميه ميه و انا الوحيده اللى انطرشت مش كده
ليه يا ميس
يا واد ما انا واقفه معاكم فى الفصل من بدرى تقدر تقوللى الخناقه دى حصلت امتى
و حضرتك بتكتبى
يا سكر و انا باكتب مش كده
ايوه
جتك اواه اتركن لى يالا انت و هو على جنب هاكتب و افضى لكم
و كتبت الدرس و دول واقفين شويه يهزروا و شوية يتكلموا و شوية يرخموا كعادتهم يعنى
خلصت انا كتابة و شرحت الكلمتين و بصيت لهم
رجاله انتوا قوى و قاعدين تبصوا للبنات مش كده
قعدوا يضحكوا برخامه
طب ماشى يا جامد منك ليه اقلع الشوز يا زفت منك ليه
نعم
نعم الله عليكم بصراحة مش لاقيه لكم عقاب تانى
و نتعاقب ليه اصلا
مش سايبين الحصة و بتبصوا على البنات
ما كناش بنبص عليهم
يا راجل
ايوه و بعدين احنا هانبص على الأمله يعنى
احمد كانوا بيبصوا و لا لأ
اه يا ميس كانوا بيبصوا
اهوه صاحبكم و عارف كل بلاويكم
ايوه و قلت لهم اقعدوا الميس واقفه قالوا مش قاعدين هى هاتعمل لنا ايه يعنى
كده يا احمد طب ابقى اشتم تانى فى اى حد من المدرسين و الله لاقول
لأ ثوانى بقى الموضوع اتقلب
بقى قلت له الميس واقفه قالك هى هاتعمل ايه يعنى
اه قاللى كده
كده يا خالد
يا ميس ده واد ابن جزمه كداب
ايه يا نهارك اسود ايه الألفاظ دى يا زفت
يا ميس ما هو بيوقع بينى و بينك و انتى عارفه انى باحبك
بتحبنى ايه و نيلة ايه ايه اللى انت قولته ده
مامته صاحبة مامتى و ما بيزعلش منى
انت راضى يقول على مامتك كده
خلاص يا ميس
خلصت روحك منك ليه لو انت راضى كده على مامتك فانا مش راضيه و روحت ضاربه الواد خالد
الموضوع كده بقى مقرف قوم يا ابنى انده لى مستر حسين ( سحس بمب )
حاضر يا ميس
ييجيى بقى الناظر يتصرف معاكم يجيب لكم جوابات رفد يشوف هو هايعمل فيكم ايه لانى زهقت خلاص
دخل سحس يتمختر و فى ايده حتة عصاية مالهاش لزمه
خير يا ميس
البهوات قاعدين يبصوا على البنات من الشباك و انا باكتب
ايه ده ازاى تعملوا كده و راح يبص من الشباك
( اه دى حصة الالعاب شغاله )
يا مستر
نعم يا ميس
تعالى اقولك لو سمحت البيه ده بيشتم صاحبه كمان بمامته
ايه قاله ايه
قاله يا ابن الجزمة
يا نهار اسود انت قولت كده يا خالد
انا اسف يا مستر
اسف ايه ازاى تعمل كده و بعدين انت معاك كشكول و لا لأ
كشكول ايه ؟ الراجل ابن المجنونه باقولة العيال بتبص على البنات و بيشتموا بعض و ده يقوله كشكول
اه معايا كشكول
طب ادخل وريهولى
حاضر
و انتوا كمان ادخلوا ورونى كشاكيلكم
يا نهار اسوح يا ريتنى ما ندهتلك يا بمب
يا مستر انا نادهه حضرتك عشان موضوع تانى خالص
ما انا عارف يا ميس ثوانى بس
يا نهار مش فايت
اتفضل يا مستر
ورونى كشاكيلكم و مين مش عامل الواجب
واجب ايه منك لله يا بعيد احنا فى ايه و لا فى ايه
هو مش كان فيه واجب يا ميس
اه يا مستر
( ربنا ينتقم منك يا بعيد على هبلك اللى ما حصلش )
طب عاوز اشوفه يا سنة تالته و ابتدى يعدى يشوف الواجب و يوقف اللى مش عامل الواجب
و انا واقفه مفروسه
لقيت
الواد اللى قاعد قدامى بيقولى احسن عشان قولت لك ما تندهيش سحس اهو هايبوظ
لك الحصة و انتى كنتى طالعه طلعه جامده قوى و كنتى لسه هاتقلعيهم الجزم
طب اعمل ايه
هاتعملى ايه يعنى انا اعرف . المهم انا مش عامل الواجب لو جه يكلمنى هازعل منك قوى
يا اخى اتنيل دلوقتى خلينا فى الراجل اللى هايجننى ده
ايه ده يا ميس دول مش عاملين الواجب
يا سلام
اه يا ميس 5 بس اللى عاملين الواجب
كده برضه يا 3 / 1 ماشى
لا يا ميس دول لازم يتعاقبوا
اللى تشوفه يا مستر
انا اللى هاضربكم بقى هى الميس عشان طيبه و ما بترضاش تزعلكم تعملوا كده برضه
طب يا مستر ما تسيب لى انا الموضوع ده انا هاضربهم
لا احنا عايزين مستر حسين هو اللى يضربنا
بعد اذنك يا ميس انا اللى هاعاقبهم
و راح رايح بالبتاعه الهبلة اللى فى ايده و ضرب كل عيل ضربه خليتهم مسخسخين من الضحك بسببها
و انا واقفه حاسه ان ضغطى على و دماغى هاتولع
و بعد ما ضربهم . اى خدمه يا ميس و كل حصة انا اللى هادخل افتش على الواجب .
و العيال بتضحك برضه و خرج من الفصل
بصوا معايا يا شباب
قاعدين بيتكلموا برضه
يا رجاله . هانقول كلام حلو مش هانشرح حاجه
العيال كلها سكتوا
دلوقتى عيب نبص على البنات و هى بتجرى و تنط و تلعب انتوا مش عندكم اخوات بنات ترضوا حد يتفرج على اخواتكم؟؟
يا ميس احنا ما كناش بنبص على البنات و الله
هانكدب تانى
لا والله بجد احنا كنا بنبص على ميس مها
مها مين
بتاعة الالعاب الجديدة ام عيون خضرا
يا راجل
اصلها صاروخ يا ميس
احترم نفسك يا زفت
بس يا واد يا عمر صاروخ ايه ما تزعليش يا ميس حضرتك احلى
و النبى هو انا غيرانه يا متخلف انت
امال ايه طيب
يا ابنى عايزاكم تحترموا نفسكم بدل ما اقلب عليكم و اخليها سنه سوده على دماغكم
اه و تندهى لنا سحس مش كده
لا يا حبيبى مش كده و انا انده سحس ليه ما انا انده الخرطوم احسن و هو يتصرف معاكم
انتى على طول كده يا ستى ما تزعليش خلاص مش هانبص تانى
طب الهى اللى يبص تانى ينشك فى نن عينه قادر كريم
بعد الشرعلينا
اخرسوا جتكم القرف
وبعدين الجرس ضرب ومشيت وانا عماله اشتم فى الجيل المنيل ده
موضوع: مذكرات مدرسة مجنونة .. الحلقة 15 
الأربعاء 11 نوفمبر - 23:01
