يوميات شاب فكسان .. في اول يوم جامعة

اول يوم في الجامعة..صاحي من قبل الفجر و اخذت الحتة اللي عالحبل و قاعد اكوي و اظبط اللبس و اجلجل شعري بقي و ايه .. بقيت حاجة انتيكه يعني ..

المهم نزلت لقيت نفسي ناسي كشكول المحاضرات (مش علشان اكتب فيه ولا حاجة..لا انا باخده علشان اقعد عليه علشان البنطلون ميتوسخش) .. طلعت السلالم و قعدت ارن الجرس..ارن..ارن..محدش فتح...بابا...و اخبط الباب...ماما..و ارزع فيه....مافيش برده....

لقيت الحاجة ثنيه جارتنا طالعة من الباب بتقوللي "انت عايز حد هنا يابني؟؟"

"صباح الخير يا حاجة ثنية عاملة ايه...ازي الصحة..."

قالتلي "مافيش حد في البيت ده يابني...الناس اللي كانوا هنا عزلوا من 13 سنة.."

"نعم ؟..عزلوا...عزلوا ايه بس يا حاجة...ده انا اصلا اللي ساكن هنا...!!..خشي نامي بس انت و استريحي "

بصيت في الساعة..."يا نهار ابيض...ده انا كده حتأخر عالمحاضرات..باباااا...ماماااااا.."...لقيت بابا طالعلي بالجلابية و الشبشب و نازل في ضرب "هو يابن الكلب ماينفعش تسيبنا مخمودين ساعتين علي بعض .. لازم تقرف اهلينا ياض "

"معلش يا بابا اصلي نسيت كشكول المحاضرات و المفاتيح و اكيد مش حاروح المحاضرات اقعد اتكلم و ماكتبش يعني ؟ (يا كذااااااب)...المهم دخلت جبت الكشكول و المفاتيح و الحاج دخل "اتخمد" من تاني...

و نزلت جري بقي و فرحان...رايح اول يوم الجامعة بقي...و انا نازل عالسلم وقعت و اتشئلط و اتكسرت رجلي ..الجيران شالوني و ودوني المستشفي (و طبعا الحاج و الحاجة كل ده نايميين) و جبست رجلي ..

"بقي يا عالم حد يروح الجامعة اول يوم رجله مكسوره .. ما علينا...قلت بقي علشان الواحد مايتبهدلش يركب تاكسي...مكانش معايا فلوس كتير...قلت يبقي اركب تاكسي قديم كده علشان السعر يكون خفيف...لقيت تاكسي "لادا" و السواق عنده من 80 او 90 و انت طالع..!!

قلتله جامعة ياسطي...قاللي ايه؟...قلتله جامعة؟...قاللي مين ؟...جامعة؟؟...بتقول ايه يابني مش سامعك...جاااااااامعة... "ااااه معلش يابني سامحني اصل سمعي علي قدي...

المهم ركبت و فضلت قاعد...ايه ياسطي انت ما بتمشيش ليه ؟...قاللي "مانا ماشي اهه يابني"...ببص بره لاقيتنا فعلا ماشيين...بس ايه السرعة ديه ... ده الراجل ماشي علي 6 كم / الساعة غالبا !!!

"ياسطي سرع شوية خلينا نوصل .. قالي " ما انا سريع اهه .. انت عايزني اتهور ولا ايه "
المهم سكت .. عارف المثل اللي بيقول "رضينا بالهم و الهم مارضيش بينا" هو ده اللي حصللي . فجأة سمعت " تودودودو بوم تاخ دوم تش تيننن " و العربية وقفت "معلش يابني العربية لازم تريح شوية" .. "تريح شوية ! ..يا عم انا نازل .. "

رحت نازل...يا دوب نزلت من التاكسي و لقيت عربية بسرعة رهيبة و كان في بركة مياه "بيييب بيييييب...فوووو...تششش" يابن ال*** !! المياه ديه كلها طرطشت عليا و هدومي كلها اتبلت و انا رايح الجامعة .. طب انا دماغي جزمة و حاروح كده .. هه ...

المهم فضلت واقف علي بال ما "انشف" شوية .. لقيت ميكروباص بينده "جيزة جامعة جيزاااااع" ... جامعة ياسطي ؟ ..ااه تعالي يا برنس ...

دخلت و ركبت في الكنبة اللي ورا و كالعادة نفس الخناقة بتاعة كل يوم "رايح فين يا كابتن .. ياسطي الكنية اللي ورا بتشييل تلاتة بس و انت عايز تركب واحد رابع ازاي يعني يعني اخده علي حجري ده ولا اية و بعدين في حريم هنا و ماينفعش نلزق فيهم كده و الدنيا حر و الشباك معصلج و ..." "يا باشموهاندز معلش بقي نساع بعضينا كده علشان كله عايز يوصل و السكة زحمة يعني لامؤ اخذة ..

" المهم ركبت و الناس سكتت ..و انا قاعد في امان الله لقيت الراجل اللي كان محموق اوي اني حاركب رابع ورا ده نام علي كتفي و الناحية التانية ست قاعدة تاكل لب و تتف علي بنطلوني "ايه يا جدعان الله يقرفكوا .. بقي ينفع كده "

"بووووووووووم " اايه ده...يووه خبطنا في العربية اللي قدامنا .. و السواق نزل خناق مع الراجل "ايه يا عم انت ما بتشوفش ولا ايييييه .. لا يابا ده انت الي وقفت فجاه .. يا عم انت عبيط اقف فجأه ليه طيب .. طب تعال بقي يلعن ....!! و بدأوا في الخناق ...و عينك ما تشووف الا النور ...

نزلت من الميكروباص و حلفت ل اروحها مشي ... و فجاه خير اللهم جعله خير لقيت بامبراية (مفرد بامبرز) بتترمي من عربية و تلبس في وشي .. اموت و افهم بيرموا الحاجات ديه في الشارع ليه .. المهم ما علينا .. خلاص .. اهيه .. وصلت .. هي ديه الجامعة ..ايوه .. ياهوووو .. اخيرا بقي .. ياااااااه "

دخلت المدرج .. ايه ده .. دول سنه رابعة و انا لسه اولي .. رحت افهم من شؤون الطلبة .."لو سمحتي انا محاضراتي انهارده اول يوم بس دخلت لقيت اللي جوه سنة رابعة مش اولي " ... "ااه.. ما هو الجدول اتغير" .. "اتغير ؟ ازاي ؟ ده الجدول لسة نازل اول امبارح" .. "ااه ما هو اتغير امبارح "

...."....." ..."
رحت ضارب الراجل بالكشكول في وشة و نمت اليوم ده في القسم