انا ليه محجبه ........؟؟؟؟

انا محجبه ....وانتي محجبه ......ومعظمنا محجبين ......بس كم واحده مننا عارفه هي محجبه ليه؟

يا تري عشان لقت البنات في السن ده بيلبسوه ...ولا عشان بقي هو الموضه

طيب ما تيجي نكلم عن الحجاب بطريقه منطقيه ومعاصره .....

أنا محجبة واخترت الحجاب طواعية بعد إيماني اولا واخيرا بأمر ربنا بأن الحجاب فرض على كل مسلمة وإلي جانب الطاعة والامتثال لامر الله سبحانه وتعالي فهناك الأسباب التالية:

- علشان انا حرة..مش من حق حد يشوف مني اللي مش عاوزاه يشوفه إلا بإرادتي … ومن حقي اختار مين اللي يشوف مني أجمل ما عندي .. واللي علشان يشوف ده ويبقى حقه وحلاله بلاله عن طيب خاطر.. لازم هو كمان يديني مشاعره واللي باقي من عمره عن طيب خاطر…

2 - علشان أنا غالية.. مينفعش أقلل من قيمة نفسي واخليها عرضة لكل العيون لتنهشها .. ويبقى خروجي مكشوفة ضوء أخضر لكل من هب ودب يسرق مني ولو نظرة لأي جزء مش متغطي مني.. حتى لو مكنش ده قصدي.. بس مش حقدر امنعه.. كامل اعتذاري لغير المحجبات.. ولكن ده اللي حيوصل منك لضعيفي النفوس حتى لو مكنش ده قصدك.. وده اللي علشانه ربنا فرض الحجاب . علشان ميطمعش فيكي الذي في قلبه مرض.. مع الأخذ في الاعتبار انه “كل من هب ودب ده” مش بس الشباب اللي بيعاكس البنات في الشارع.. ده يتضمن حتي الزبال اللي بيسوق عربية الزبالة في الشارع.. كل دول بقى من الممكن انهم يبصوا لي.. واشيل انا وزر نظراتهم تلك .

انا ليه محجبه ........؟؟؟؟ Hijab

3 - علشان أنا باحترم نفسي.. وشايفة نفسي كبيرة قدام نفسي.. ومينفعش أنزل سوق المنافسة في الأنوثة علشان أفوز في الآخر بنظرة شهوانية أو كلمة غزل رخيصة أو عرض صداقة وصحوبية لاترضي الله ورسوله صلي الله عليه وسلم .

انا ليه محجبه ........؟؟؟؟ Untitled44

4 - علشان انا جمالي مش خارجي وبس.. ومن حقي ان اللي ييجي يتجوزني.. واللي حاديله الباقي من عمري.. واللي حديله كل مشاعري.. واللي حاقاسمه أحلامي وأفكاري.. واللي حخلف منه ولادي.. وح اربيهم معاه.. مايختارنيش على مقاييس شكلية وبس.. أو تبقى هي دي العامل الأساسي في أختياره ليا.. علشان كده مش ضروري يشوفني في كامل زينتي وجمالي قبل ما يتجوزني.....الاهم انه يحب روحي ويعجب بشخصيتي

ويرتاح معايا نفسياً.. أصل في بنات بتأجل الحجاب لحد ما تتجوز.. على أساس انها تكون شنكلت واحد وضمنته.. مع إن مفيش حاجة مضمونة في الزمن ده.. واللي اختارها علشان جمالها.. ممكن قوي يتجوز عليها واحدة أجمل منها.. لأنه أكيد في هناك الأجمل منها.

5 - علشان أنا باخاف على أخويا في الله اللي بيشوفني في الشغل أو في الكلية أو في المواصلات أو في الشارع.. ويمكن يكون عاوز يقرب من ربنا.. وبيجاهد نفسه علشان يغض بصره.. فمرضاش لنفسي اني اكون سبب في اني افتنه في دينه .

اظهار الصوره

6 - علشان أنا باشيل هم أخويا في الله اللي نفسه يتجوز ومش قادر لضعف إمكانياته المادية.. فمش ضروري يعني ازود عليه همومه.. وأخيِلُه في الرايحة والجاية ينبهر بجمالي وزينتي المكشوفة

7 - ده غير حاجة مهمة كمان الكفن بتاع النساء.. فيه حجاب.. فاللي مش ح تلبسه وهي حية بإرادتها طاعة لله.. ح تلبسه كدة كدة وهي رايحة قبرها.. وطالما ربنا بيقول اننا نتستر حتى واحنا رايحين قبورنا وخلاص انتهى

التكليف.. ومحدش حيشوفنا تاني ولا حد حيطمع فينا.. يبقى مفيش معنى اننا نمشي مكشوفين لكل العيون واحنا أحياء نرزق.. يبقى الأولى اطيع ربنا بإرادتي وأقابله وهو راضي عني وآخد أجري كاملا.. ولاّ اني ملبسوش غير وانا جثة واقابل ربنا وهوغضبان عليا.

انا ليه محجبه ........؟؟؟؟ Bamboo_girl_by_Muslim_Women

الأسباب اللي قلتها فوق دي.. هي اللي فهمتني ليه ربنا فرض علي بنات حواء الحجاب.. مش تعسير ولا تضييق.. الحجاب فعلا عزة وكرامة.. ميعرفهاش غير اللي ذاق طعم الستر.
ولو انتي كمان عندك اسباب قولي لنا عليها علشان البس الحجاب وانا فعلا مقتنعه اني كده لؤلؤه والحجاب صدفه بتحميني

ربنا يهدينا ويهدي بنات وشباب المسلمين..آمين يارب العالمين

جزاكى الله كل خير وربنا يهدينا جميعا والحمد لله على نعمة الحجاب

تم تعديل الموضوع بعد مجهود شاااق

الحمد لله على نعمة الحجاب
جزاكى الله كل خيرملاك

تسلمى ملاك على هذا الموضوع القيم

تسلمى ياقمر
نورتى التوبيك