خضرا يا كوسه...!!!!!

خضرا يا كوسه ومقطقطه

يا احلى من الملوخيه

خضرا وقادره ومتظبطه

يا رمز المحسوبيه

خليتى حياتنا ملغبطه

والعيشه مبقتش هى

ساده وكرو ومخططه

فى كل مصلحه حكوميه

*******

ظهرت مؤخرا كلمات ساخره تنتقد الواسطه والمحسوبيه وكان ابرزها تلك المقوله : لو نهر النيل اتحول صلصه مش هيكفى الكوسه اللى فى مصر.
ومنذ زمن تتردد كلمة كوسه كنايه عن الواسطه والحسوبيه .. لدرجة انى بقيت
بكره الكوسه جدا بعد تعرضى لمواقف اضطهاد وظلم لانى للاسف مش معايا واسطه
ولا ضهر اتسند عليه او بمعنى اصح مش معايا كوسايه اتسند عليها ، واصبحت
ايضا مفاهيم القوه تعتمد فى الاساس على الكوسه التى يمتلكها الفرد ، معاك
كوسه هتعدى وتعلى وتبقى فوق .. مش معاك يبقى الله يكون فى عونك هتغرق فى
الصلصه ومش هتلاقى كوسه تتعلق فيها .
يعنى لو حضرتك عايز تدور على شغل ، اوعى تعمل زى مانا عملت وتروح تقدم فى
الشغل مباشرة ، لا الاول اسأل عن الشغل ده واعمل تحرياتك لحد ماتلاقى حد
معرفه يعرف حد من المسئولين عن العمل ده وروح قدم بقلب جامد وقول انا تبع
فلان ساعتها ممكن اباركلك على الشغلانه الجديده.
وياسلام بقى لو معاك واسطه تقيله فى الحكومه ، يعنى كوسايه كبيره كده من
الحجم العائلى ، امشى فى البلد واعمل مابدالك ولا يهمك من حد ، وامانه
عليك بعد الكلام ده لو انا اتشديت تشوفلى الواسطه بتاعتك تخرجنى .
ولو عندك سياره ، لازم يكون عندك كوسايه فى المرور ، ساعتها تمشى فى
الشوارع براحتك من غير ماتربط الحزام ، وتكسر كل الاشارات وتتجاوز السرعات
المحدده ولا يهمك ، ولو وقفت فى كمين ادخل على الامين بقلب جامد ولا يهمك
من حد ، وابتسم انت معاك واسطه .
نيجى بقى لاخواننا الغلابه اللى انا منهم ، كلهم يحسسوك انهم راضيين
بالعيشه واللى فيها وتقوله معاك واسطه ، يبصلك بنظرة كلها رضا وقناعه وتحس
انه هيبكى ويقولك انا واسطتى ربنا ، وهو من جواه نفسه ومنى عينه يلاقى
واسطه تسنده فى عالم الكوسه فيه بقت رقم واحد.
حد فكر قبل كده ايه علاقة الكوسه بالواسطه ؟؟ وليه بيقولوا على الواسطه والمحسوبيه انها كوسه ؟؟
يقال والله اعلم ان الموضوع يرجع لزمن بعيد ، فى اسواق الخضار قديما كان
فيه يوم واحد فى الاسبوع يتم فيه نصب سوق الخضار وكانت الحكومه هى
المسئوله عن تنظيم تلك الاسواق وكان بائعى الخضار يقفون فى طابور طويل
للسماح لهم دخول السوف وبيع بضائعهم وكان بائعى الكوسه اول من يتم السماح
لهم بدخول السوق لان الكوسه سريعا ماتفسد من الحر ، فكان ياتى بائع الكوسه
من اخر الطابور ويسمح له بالدخول اول فيهلل الواقفون ويعترضون فيرفع بائع
الكوسه يده ويقول ( كوسه ) !!