والحرفه حرامى حريف




يسرق الكحل من العين




وايده من الوزن الخفيف




وانهارده المولد ياسادة




يعنى حيجرى للمحافظ تنضيف




لبس سيد عدة الشغل




بالطو مخبر وعصاية فى ايدة




لزوم التخويف




ورسم على وشه الجدية




تقولش عنتر ومعاة سيف




ورفع أيدة للسما وقال




يارب محافظ ودهب وفلوس




أنت عارف أنى متواضع وعفيف




عمركم شفتم حرامى بيسرق




وبيطلب العون من اللطيف




ونزل جرى على المولد




بسرعة البرق والطيف




وقعد يمنى نفسه بفلوس كتيره




لزوم الفرفشة والكيف




وصل للمولد وفتح بقه بدهشه




كل دول بشر.. أحلوت ياخفيف




ضرب العصايه تحت باطه




ونادى بصوت جهورى مخيف




محفظتك .. حاسب جيبك




من اللصوص أنا بحذركم ياضيوف




نادت وليه على ابنها ياواد تعالى




لتتوه وتخلى عليك بالى أسيف




وقالت لسيد ربنا يخليك لينا




ياحمينا ياطيب أنت ياظريف




بعد جولة كبيره وسط الناس




وبحث فى مسالك الجيوب والتجاويف




المحصلة صفر ولامليم وجيوب الناس




زى الصينى بعد التنضيف




صرخ سيد يانهار أسود ياجدعان




الناس مفلسه زى سحابة صيف




سند ضهرة على حيطة شادر




مداح جواه بيغنى




والناس نازله تصقيف




وطلع سيجاره دبلانه من جيبه




وبقلبه من القهر نزيف




ضرب بعينه وشاف واحده




جايه ناحيته ولابسه




لبس شعبى نضيف




وفى أديها محفظه نور ليها




وجه سيد وصرخ من الفرحه




أخيرا فرجت ياشيف




فرك صوابعه وأنتبه بكل حواسه




كرب أسره مهموم بالمصاريف




قربت الوليه عليه وبتذلل




قالت له والنبى يابيه




ماعكش حق رغيف






أحمد عبد الشافى