[ندعوك للتسجيل في المنتدى أو التعريف بنفسك لمعاينة هذه الصورة]


البقاء لله والبقية في حياة كل مصري توفت الي رحمة الله تعالي الكهرباء
وذلك بعد صراع مع الحكومة عفوا صراع مع المرض استمر عدة اشهر وسيتم تشييع
الجنازة قريبا جدا جدا
اه..اه..اه
بيقولها كل مواطن مصري من قلبه الاهات ديه
من الغلاء والرشاوي والفساد والدروس ...الخ الخ
وكمان جت بقي الكهرباء عشان تزود همومه هم كبير تاني
من فترة كده يدوبك حوالي 5-6 شهور والكهرباء تقريبا كل يوم بتقطع بالتناوب
في مناطق الجمهورية كلها
ومن فترة استضافوا الوزير وقال رد رخم سالوه ليه الكهرباء بتقطع رد بكل
بساطة بنريح الشبكات عشان مفيش وقود يشغل المحطات
ينهار اسود بيقولك مفيش وقود ومن دلوقتي ماهو كان ممكن يلاقوا وقود لو
بطلوا يصدروا الغاز لاسرائيل
وسيبك من كده كمان ده فيه مصايب جاية بس اقري الموضوع للاخر
طبعا احنا كلنا عارفين التقرير اللي بيقول ان مصر هينفذ منها الغاز سنة
2019 يعني بعد 9 سنين باذن الله
لما هو مش لاقي وقود دلوقتي امال بعد 9 سنين هيعمل ايه هيقطع الكهرباء
بالاسبوع
وكمان الحمد لله غلوا سعر كيلو الكهرباء اظاهر عشان بتقطع
هو احنا عاوزنها تقطع وتبقي رخيصة كمان ده احنا طماعين اوي
تعالي للاسخن بقي
النقطة اللي مفيش كائن حي في مصر اتكلم فيها خالص_احم احم غيري انا لو
اعتبرتني حي_
وهي ان نهر النيل هيقل ودول حوض النيل عاوزة تقطعه عننا وكل الكلام ده
طيب لما نهر النيل هيقل هيحصل ايه بقي الشاطر يجاوب؟؟
اول واحد هيقولي المية هتقل وسعرها هيغلي برده
هقوله صح وايه كمان؟؟فكر كده يمكن تجيبها
لو مجبتهاش انا اقولك ايه كمان
تعرف طبعا ان النيل بيولد تلات تربع الكهرباء بتاعت مصر
لما مية النيل تقل بقي!! ايوة برافو عليكم يبقي اوتوماتيك الكهرباء بتاعته
هتقل
يعني باذن الله اضمن لك بعد 5 سنين بالكتير ستكون مصر تغرق في عصور الظلام
الوسطي بكل معني الكلمة
وبالمناسبة عندنا كل يوم الكهرباء بتقطع حوالي 3-4 ساعات مع اني مش ساكن في
الجبل ولا في الصعيد الجواني انا ساكن في اسكندرية تخيلوا؟؟ وفي حي فيه كل
الخدمات كمان
والحال ده علي اغلب مناطق اسكندرية وكلها بالتناوب زي ما انا قولت
ونرجع للوزير تاني اللي كمل كلامه وقال ان محطات الكهرباء معدتش مستحملة
الضغط اللي عليها ( يعني مفيش كهرباء تكفي كل الناس ديه بمعني اصح) وسالوه
لو فكرتوا تعملوا محطة طاقة نووية قالهم من5-9 سنين وعليكم خير ومن كام يوم
قالوا انهم هينزلوا جدول لمواعيد قطع الكهرباء شوفتوا النظام بقي؟؟
وهكذا تلفظ الكهرباء انفاسها الاخيرة لتلحق بمن سبقوها من اخوتها واخوانها
ومنهم(الديموقراطية-العدالةوالمساواة-الضمير)
واخيرا تصبحوا /تتمسوا علي خير وعلي شقة فيها كهرباء وغاز وعيش كمان اهم
حاجة العيش عشان الازمة بتاعت اليومين الجايين